Bukal

Bukal

Ang tanging ninanasà

tuluyang maulilà

itong bukal ng luhà

diona.f.xi.c.ix.s.xii.vluna

Ngitî

Ngitî

Tapos na ang pighatî

ang luhang nalalabî

mapapal'tan ng ngitî

diona.f.xi.c.viii.s.xii.vluna

Samyô

Samyô

Ang naiwan mong samyô

sa'king isip at pusò

ang sa'yo magsusundô

diona.f.xi.c.viii.s.xii.pca

Dasal

Dasal
 

Sa kandungan ng langit

dasal paulit-ulit

ang iyong pagbabalik

diona.f.xi.c.vi.s.xii.narra

Tagpuan

Langit itong tagpuan
habagat nag aabang
sa yakap ng amihan

diona.f.xi.c.vi.s.xii.pca

Kahit Sa Tula

Kahit Sa Tula

Kahit man lang sa tula

matupad ang lunggati

kahit pa maalila

basta ika'y ngumiti

Tanaga_Sunday, September 30, 2012

Mahal Kong Pakbet

Mahal Kong Pakbet

 Ulam nangangamote
nangayayat ang lasa,
hataw kasi dumoble
paít ng ampalaya.

Talóng nangagsiiksî,
pakbet kong tinitimpla
sa badyet kong tinagnî,
t'yak mangangalabasa.

2tanaga.9.f.28.c.12.s.anonas

Ikaw Ang Aking Tulâ

Ikaw Ang Aking Tulâ

Tinitingaláng talatà

tila patáy-sinding talà

kasíng babaw lang ng tuwâ

kasíng baba lang ng luhà.

Ang diwà ay ligalíg

waláng pintig itóng pantig

titik na sa luha'y dilíg

sa kawalan nakahilig.

Ngayon, hindi na ulilà

ang mga saknong at tugmà

dahil sadya Nyang tinakdà

ika'y maging aking tulâ.

Awit.f.9.c.19.s.12.kalayaan

Happy Pot Wedding Anniversary mahal!

Kaibigang Tapat

Kaibigang Tapat

O kay sarap mayakap

ng kaibigang tapat

kesa pasasalamat

ng isang mapagpanggap.

Tanaga.fcs.9.22.12.Kamagong

"Propeta"

"Propeta"

"Magugunaw na ang mundo!"

sìgáw ng propetang pagód

mahina't uugod-ugód

habang naninigarilyo.

f.9.c.18.s.12.kamagong

Photo credit: Ricky Refuerzo

Kalahatì

Kalahatì

 

Kalahating mamà

kalahating ale

gutóm na sikmurà

binatak ng kalye.

f.9.c.18.s.12.kalayaan

Bumabáng Waláng Dangál

Bumabáng Waláng Dangál

Sakáy ng dyip ang pulís,

porma nya'y hustong takal,

tapos ay tumalilís

bumabáng waláng dangál.

f.9.c.17.s.12.kalayaan

Tapak

Tapak

Hindi hangad ang papuri
o kaya'y maparangalan
wag na sanang iaglahi
at ang likod ko'y tapakan.

f.9.c.17.s.12.molave

Ang Hunyango, Anay, Bukbok at Lamók

Ang Hunyango, Anay, Bukbok at Lamók

Sa labás, tingín mo ay matipunô
may gilas ang pundasyon, matitinô
pero buhatin mo kanilang bangkò
magaan, inaanay ng hunyangò.

Upuá'y walang bakás pagkabulók
ngunit kung idadaan sa pagsubok
ihaplit ang pangtuwid na pamukpok
binukbok nga ng mga utak lamók.

Mapakinabangan pa ba ng madlà,
kung uri'y tuluyang panggatong na nga?
Mukhang bago subalit sadyang lumà,
isang patibong na mapaminsalà.

f.9.c.12.s.12.sikatuna

Da-Di!

Da-Di!

Sumisinghap, paputól-putól,
hinahanap ang aking tinig
at pilit na ipinupukól
kanyang unang dalawang pantig.

Kasabay ang hiyáw padamdam
at pangungusap na kay lambing
sa tatlong tuldok na katawan,
ay sigáw na kay saráp dinggin.

Sinong ama'ng di maaantig
diníg sa bulól na katagâ,
dal'wang buwang may dal'wang pantig,
may mensaheng hamon at tuwâ.

Kayá kinalong, tinuldukán
kanyang maliliít na hikab
at mga patlang sa katawán
sa kudlit ng antok at alab.

f.viii.c.xx.s.mmxii

Dama(y)

Dama(y)

Maaaring lumipas ang unós,
maaaring ulán ay tumilà,
maaaring bagyó ay maghunos
o di kayá'y humupà ang bahâ...

...pero hindi ang kapabayâan,
'di ang kawalán ng disiplina,
'di ang paglabág sa kalikasan,
o kawaláng pagpapahalagá.

Hindi ang pagbabató ng putik,
hindi rin ang pamumulitiká,
hindi rin ang mga pumipitík
o waláng katuturáng pag gasta.

Hindi ang nabubuhay sa suhol,
hindi ang pamumulá ng gubat,
hindi ang sa yaman nauulól,
hindi ang pagtabáng ng dagat.

Hangga't may mga nagpapasawáy
at mga nagwawaláng bahalà,
damá nga natin patí ang damay
kapág dumadama ang sakunâ.

viii.f.viii.c.mmxii.s.=¤
Ito ang una sa apat na bahang tinawid ko - panulukan ng
Anonas at Tindalo St sa may Proj. 3 noong Agosto 8, 2012

May Bagyo Ba?

May Bagyo Ba?

Walang

magagawa

kahit sinong santo

upang mapigilan itong

bagyo

kaya naman

magtitindang santol

upang tugunan sikmurang

kalam.

f.viii.c.vii.s.mmxii.c-wealth

Talino Lang Ni Pilato

 Talino Lang Ni Pilato

Hindi pa nga naampat

ang mga unang panaghóy

luhang di dapat pumaták

mulí na namáng dumaloy.

Pag-asa'y mulíng nanangis

sa kinapatirang pangkat

anák mahál na kay tamís

pangarap, naglahong ganáp.

Hindi nga ba kalokohan,

pumasá magíng bihasâ

subukin ang katapatan

sa tulong ng mga pasâ!

Di ba kabalintunaan

kapatiran ay kasanggâ

mag aral ng katarungan

patí na maging masamâ!

Anóng silbi ng talino;

magalíng nga anóng saysay,

kung tulad lang ni Pilato

mahusay, maghugas kamáy!

f.viii.c.vi.s.mmxii.kalayaan

Pwede Na Uli Maglayag

Pwede Na Uli Maglayag

Mag iisang buwan halos,
nang tila pagba bayuhin
ng masamang pangitain
ang magkabilang baybayin
sa dagat ng kaisipan.

Matinding sikat ng ulo,
pulo-pulong panibugho
na may dagling pagtatampo
at manaka-nakang yabang
ang nanalasa sa tuwa.

Nagdilim ang kalabisan,
nagkulay ihi ang dagat,
naglaho taglay na alat
at nanupok ang santelmo
dahil sa sama ng loob.

Ngayon...

...pwede na uli maglayag.

f.viii.c.iii.s.mmxii

Aya Kay Arah

Aya Kay Arah 

Ala nga bang mapapalA,

Bibihagin ba ng alaB

Kakabig nga ba ng haliK,

Dagling magiging mapalaD?

Ewan, tukso 'tong 'di balE!

Ganunpaman, di papayaG;

Heto ako reyna AraH,

Itataya ang sarilI,

Libakin ma't maging hangaL,

Magtit'yaga hangga't alaM

Na buhay, sa'yo lang laaN.

NGayon, bukas magpa hanggaNG,

Oo, magpahanggang dulO,

Pakamamahaling ganaP.

Ramdam ko at nasa lugaR;

Sa kaibuturang wagaS,

Talima pati ang takoT.

Umaasa itong DatU,

Wakas na ng pagkauhaW

Yamang ikaw ang tagumpaY.

f.viii.c.ii.mmxii.s

Pagtahan ng Unos

 Pagtahan ng Unos

Ang unos at malupit nitong balabal,

di baleng sa lupa mag-iwan ng marka

o magbaon ng hapis at pagdurusa,

huwag lang nawa, na tayo ang mabuwal.

f.7.c.24.s.12

Rosas

Rosas

Rosas

nakapikit

pag gising maganda,

sa kanyang konting panahon;

lanta;

mangungupas

mangaglalaho sa mundo:

tulad nga ng tao;

bandang huli,

bulok.

10.30.11

(Unang subok sa Mirror Cinquain

sa inspirasyon ng Isaiah 40:8)

Buntong-hininga

 Buntong-hininga

T'wing palubog ang araw,

buntong-hininga

itong pamatid-uhaw.

05.17.11

Nganga

Brap badap barabadabap...
tumapat sa 'sang tindahan,
tambol ng namamalimos,
na animo nanggugulat
sabay binigkas ang NGANGA!
Wala! sabi ng tindera.
NGANGA! ulit pa ng mama.
Pareho lang tayong NGANGA!
sambit naman ng tindera.
NGANGA! sa pangatlong ulit
anas ng mamang makulit.
Tindera'y napasimangot.
Kaya umalis ang mama
sabay sigaw ng MADAMOT!
fcs.vii.xiv.xii.salem

Daan Ng Mga Langgam

 Daan Ng Mga Langgam

Gabing may katamisan

laging inaasahan

mag iipon ng sabik

sa mamantikang latik

nang hindi na magpaalam

ang daan ng mga langgam

sijo.vii.xxvii.mmxii

Habilin

Sa'yo ihahabilin

ang buhay ko o hangin

doon mo ako dalhin

kung saan ka nanggaling

kung saan walang panimdim

at natulog na ang dilim

sijo.vii.xxvi.mmxii

Lumang Dahon

Lumang Dahon

Ang unos ay walang pasubali;

minsan ay tahimik tila kimi,

datapuwa't hindi mangingimi

na ang hagipin nya ay mabali.

Tatango na lang ako sa ihip

sapagkat di ko kayang malirip

kung bakit minsan ay tinatahip

palayo sa ating panaginip.

Uunawain nang mahinahon,

sasakyan ang puso ng panahon,

baka kasi simula pa noon
taglay pa, ang mga lumang dahon.

f.07.c24.s12.kamagong

...isang pagbubulay mula sa 

"Unos sa Unang Dekadang Paglagi" 

ni kaibigang Michel Olivares Sarifa

Hindi Ako Perpekto

Hindi ako magtitiwala sa'king dila

dahil puwede itong madulas,

Hindi ako magtitiwala sa'king puso

dahil ito'y pabugso-bugso,

Hindi ako magtitiwala sa'king tenga

dahil wala itong pang-unawa,

Hindi ako magtitiwala sa'king isip

dahil ito ay limitado...

hindi kasi ako perpekto.

f.o7.c23.s12.kalayaan

Liham Pag-ibig

Huwag tumangis

sa paglipas ng sandali

sapagkat ito’y mahaba

kumpara sa saglit

na hindi na bumalik.

Hindi man bumalik,

ang mahalaga

ay ang naiukit

ng tapat na titik

na nagmumula,

sa pusong pumipintig.

fcs.vii.xiii.xii.kamagong

Mahiyaing Matapang

Ninais kong mahaplos

makukulay na bungkos

kasing rikit ng rosas,

subalit nang dukwangin;

nagpaubaya naman,

lamang, ako’y duguan.

fcs.vii.xiii.xii.kamagong

Makahiya

Mailap,

dinig

maging pintig

sa’king dibdib. 

Mahinhin,
ngunit
magka minsan,
maramdamin.

Maselan,
labi’y
hindi basta
nahahagkan.

Angkinin,

pero

maging handang

masugatan.

fcs.vii.xiii.tindalo

Sa Kawa Lang

Pagtibayin ang kalinisan

bago ito pagsaluhan,

pasayawin ang init

ang katas ay gatungan.

Baong matamis, tandaan,

mas maganda kung lulutuin…

…sa kawa lang.

fcs.vii.xii.xii.kalayaan_sevenling

Punla ng Tula

Ulila man sa pansin
kampo ng magagaling,
pawang nagsisilimlim.
inuukit sa init
ang rimang maririkit
kahit sa loob ng dyip;

...mapipisa ang tula.

hanggang muling maglimlim
isip manginginain
samut-saring kakanin.

katuwang itong tandang
maghahanap sa parang
matamis na pukyutang

…magdadala ng punla.

2/21/11

Paalam Pidol

Nagagalák,
hindi dahil sa iká'y nawalâ,
kundi dahil sa iniwang tuwâ.

Natutuwâ,
hindi dahil sa iyóng pag uwî,
kundi sa iniukit mong ngitî.

Nangingitî,
hindi sa akó ay natatawá
kundi sa masayáng alaala.

fcs.vii.xii.xii.vluna

Sa Tangan Kong Anak

Muli, aking nasilayan

sa pikit nyang mga mata

ang Iyong tanging pagtingin.

Minsan pa ay nahawakan

sa maliit nyang daliri,

ang kamay Mo kamahalan.

Dinig ko, kahanga-hanga

sa kanyang unang pag-iyak,

tinig Mong walang kapara.

Nadama ko ang 'Yong yakap;

pag-ibig na di masukat,

sa tangan-tangan kong anak.

fcs.vi.xvi.xii.st.lukeserod9:12am

Mga Lintang May Buntot ng Diablo

Hindi tulad ng alitaptap na may sariling ilaw,
ang mga lintang ito na animo
may sanga-sangang buntot ng diablo
ay may huwad na liwanag
na ang dugong bumubuhay
ay nahihigop sa taba
na galing sa pawis
ng nangangayayat
na balana.

fcs.vii.iii.xii.kamagong

Pulang Kalsada

Apatnapu't-limang minuto;

kasangga si habagat,

nakihamok si maitim na kulog,

nakipaglaro kay kidlat, 

na ang kakampi'y pangkat ni bituin.

Natapos ang pagpapambuno

na halos walang galos,

subalit nahati ang langit

nang ang ulap ay magalit

sa pagkatalo ni kidlát.

Dahil sa pagkadismaya,

si bahaghari'y nagmaktol

sabay naki-upak,

humahaginit naman si unos

habang panay ang palatak.

Kaya ang barkadahan ni kulimlim

tinipong pawang nakanganga,

pinagngalit sina singaw at hamog,

isinugo ang mala-asupreng si ulan

hanggang sa ang kalsada,

nagkulay pula.

fcsvi.xxx.xiikalayaan

Malayang Kamalayan

Tahimik,
ang mundo sa'king isip,
mahimbing ang tulog at kuntento.

Ngunit ang patlang,
di mapakali sa agwat ng saglit at sandali
na pumipintig ang aking puso.

Nang magkadaupang palad sa dambana
ang ating mga buntung-hininga,
ang nakapiit kong kamalayan,

sa wakas, ngayon ay lumaya na.

fcs.vi.xxviii.xxii.kalayaan

Kung Hindi Pa Umulan

Lunes,
maaliwalas
ang araw.
Martes,
ang sarap
magpahingalay.
Miyerkules,
maalinsangan
ang hangin.
Huwebes,
nagdilim
ang kaulapan.
Biyernes,
basang-basa
sa ulan.
Sabado,
ano pa
di nilagnat.
Linggo,
umuwi
sa asawa ko.
fcsviviixiimolave

Hiyas

Hatinggabi, nakatanghod ako sa Ilog Opon

habang nagbabakasakaling mahuli ang antok

nang mapansin ko sa kalagitnaan nang pagmumuni-muni

ang isang maningning na hiyas sa gitna ng tahimik na tubig.

Naengkanto ako sa kakaiba nitong kislap kaya hindi ko namalayang

hinahatak na ako ng aking paa palusong.

Mahina ang daloy sa pampang

pero habang kumakampay patungo sa gitna,

nararamdaman kong bumibigat ang agos.

Ganunpaman, naabot ko rin ang inaasam.

Sa kasamaang palad, sandali ko lang itong nahawakan.

Sa kabila ng pagsusumigasig,

napagtanto ko na kung sasalungat ako sa agos

at pilitin itong makuha, mawawala ang kanyang ningning,

masasaktan ako at dalawa kaming mawawala.

Kaya binitawan ko sya, pumikit ako

at nagising sa kandungan ng isang reyna.

fcsvivixiikalayaan

Akala Ko

Matagal ding nagtampisaw
ang alon sa lilim ng mga bituin,
naki-indak sa ngiti ng dagat
na ang galak,
walang mapagsidlan
tuwing kabilugan ng buwan.

Naghintay ang dagat
sa akalang ang buwan
ay magtatapat,
hanggang sa
unti-unting naghari ang dilim
at napatunayang hiram,
ang taglay nitong ningning,

tulad nang akala kong ika'y akin.

fcsvi.v.xiikalayaan

Kinimkim

Hindi ako matahimik,
pilit ko mang labanan
ang ingay sa aking dibdib.

Kaya anumang dagundong,
sinikap kong languyin
ragasa ng daluyong.

Ngunit di na nakaimik,
kasabay na nalunod
kinimkim na pag-ibig.

fcsviivxiikalayaan

Konsyensya Ang Dunong

Hindi

malilito

ng matatalino

ang tao na konsyensya ang

dunong.

fcsvxxxixiivluna

Nang May Makain

Pilit idinidilat;
para lang may makain,
ang magkabilang matang
kinain ng talukap.

fcsvxxixxiikamias

Kalinga

Kalinga

Araw-araw

tuwing kakagat ang dilim,

inaagaw ang init ng musmos na katawan

hindi ng malamig na gabi 

kundi ng labis na pangungulila,

habang tila tuksong nag aanyaya 

ang malamig na sahig

na doon pansamantala

humanap ng kalinga.

vxxvixiifcsanonas

Bayan ng Dinuguan

     Nakakita ka na ba nang isang bayan na iisa lang ang restoran at ang putahe ay DINUGUAN lamang? Ang mga kusinero at buong kru dito ay mga naka kurbata pero naka pajama at halos lahat ay miyembro ng kombo, malilinis at madalas din naman maghugas ng kamay - lamang, hilaw lang ang kaya nilang ihain.

     Pauna ko lang, walang kasamang kanin ang menu dito kung inaakala mong meron. Pero dahil malawak naman ang kanilang bakurang puno ng palay; puwede ka raw dito mamulot - bawal lang giikin, papakin o lutuin. Ayaw kasi nilang makakita ng ipa bukod sa mahal daw ang mga panggatong. Sandamakmak din ang bigas dito, kaya lang di pwedeng kunin o hingiin dahil baka raw magutom ang mga alaga nilang bokbok.

     Dahil sa wala kang mapagpipilian, maghihintay ka talaga ng matagal. Pagdating mo, saka lang nila gigilitan ang baboy sa'yong harapan. Ang kakat'wa dito, parang mga maaamong tupa ang mga baboy. Mas maiingay pa ang mga matadero habang nililibang ng mga kusinero at kru ang mga naiinip na kustomer. Bukod kasi sa matagal nga, wala silang mesa at silya na pwedeng paghintayan. Meron silang upuan pero sa kanila lang.

     Pagkatapos makatay ang baboy, itatapon ang laman, itatabi ang tenga, dila at dugo, kukunin ang bituka, sasabunin nang di binabaliktad, tatadtarin at sa sarili nitong mantika, gigisahin. Pagkatapos ibubuhos ang dugo at ibubudbod ang tinadtad na tenga at dila - saka pa lamang maihahain.

     Ang kagandahan lang dito, inihahain nila ito ng LIBRE.

Pero kung ayaw mo naman nang iisa nilang putahe, pwede ka sa kanila mag request ng gulay - bubunot lang sila sa kanilang bakuran at ibibigay sa'yo kasama pati yung lupa. Bahala ka nang humimay.

Isa lang talaga ang patakaran nila, BAWAL ANG UMANGAL!

Stlukes.051812.fcs10:02am ·

Kahanga-hanga

Isang pinapangarap,
sadyang kamangha-mangha
kung pano naging ganap.

Nang unang masilayan,
di maipaliwanag
ang aming kagalakan.

Sa ating Manlilikha,
wala ngang mapagsidlan
tunay naming paghanga.

Kaya narito anak,
alay namin sa iyo
buhay na nagtatapat.

Pangako'y uusalin,
ang tugon sa'ming dasal,
ay pakamamahalin.

04.20.12_fcs_kc
Alay sa aming bunsong pangarap,
si Eunice Faye (na ang ibig sabihin ay 

Tagumpay na Pananampalataya)

Kurap

Pagkatapos sumingaw mawawala,
maiipon uli sa kung saan
at magiging delubyo
pagkatapos babagsak
nang may ibat-ibang buhos,
una sa mahihina
kasabay ng pagkabulabog
ng mga malalakas,
tapos paglalaruan
ang mga walang kaya
kundi sumunod sa agos ng ingay.
Bago manahimik,
yari na ang plano para sa sarili.

Kaya, huwag kang ku-kurap!

04.17.12_fcs_kamagong

Likha'y Anak Dalita

Ang salaping inibig
ay apoy na nagbulid
tumupok sa pundasyon
ng matatag na bansa
na sa buhanging lubid
doon nangakasalig,

mga anak dalita.

04.16.12_fcs_kc

Tunay kang Maralita

Kung wala kang pangyosi
kung wala kang pangsabong
kung wala kang pangsugal
kung wala kang pandroga
kung wala kang pantaya
kung wala kang pangtoma

tunay kang maralita.

04.16.12_fcs_kc

Sa Higpit Ng Sinturon

Maghapon at magdamag
patayan itong kayod,
sahod na kapiranggot
pambili lang ng gamot.
Pati mga kalansay
nawawalan ng buhay,

sa higpit ng sinturon.

04.15.12_fcs_commondeath ave

Kahit Wala Ka

Kahit wala ka
mabubuhay ako
dahil kapiling ko
ang iyong alaala


3.17.12_fcs_kalayaan

Tukso

Kita ng matá
ang pagpipilian
damá ng pusò
ang pagsubok,
ngunit nasa isip
ang pagpili.

031912.fcs.dar

Tulóg Ang Panaginip

Kahit anupang gawín
hindi ka makagaláw,
halos pag-asa'y tanáw
ngunit lugmok sa dilím,
matamis ang palaták
habang langô sa walâ,

tulóg ang panaginip.

031612.fcs.tsora

Kapatiran o Kapapatirán?

Saán nga ba sa katawan
naron ang paniniwalà
syang dapat na malatayan;
masubok lang, katapatan?

'San mapapatid ang pintig
ng pananampalatayà
nang mai-ukit ng palò,
sukdulang dugó'y mapatíd

matawag lang na kapatíd?

03.04.12.fcs.kalayaan

Sadyá kang Mahiwagà

Bulág kahit dilát,

makata kahit huwád,

bayani kahit duwág

umaasa kahit bigô.

Pa'no ka tumubò

'san ka nagsisimulâ

maaarók ba kitá

kung sadya kang mahiwagà?

02.17.12.fcs.kamagong

Pag-ibig, Kung ito'y Tunay

Hindi ito basta matá
na nakamamasid
para masabing
ito ang tamang pagtingin,

hindi ito basta labì
na pwedeng kulayan
para masabing
ganyan ang tamang ngiti,

hindi ito basta damdaming
nararamdaman
para sabihing
nasusuyà pag di nasuyò,

hindi ito basta hanging
habagat o amihan
para masabi kung kailan
aalis at darating,

hindi ito basta lupà
na kayang sukatin
para masabi
ang hangganan,

hindi ito basta rosas
na napipitás
para masabing
mas gusto ko pulá,

hindi ito basta bagay
na nawawalà
para masabing
makikita rin kitá,

hindi ito basta produkto
na naikakahon
para masabing
ito ang tamang pakete,

hindi ito basta ideya
na naitutulà
para magawan
ng sukat at tugmà,

hindi ito basta aklat
na nababasa
para malaman
ang dulo at umpisa,

hindi ito basta asukal
na naitatakal
para masabing
ganitó ang tamang tamís,

hindi ito basta tinda
na napipilì,
iiwan pag ayaw
bibilhin pag ibig.

02.14.12.fcs.kalayaan

Hindi Ngunit Dagat

Hindi ito dagat
para masukat
ang lalim o babaw,
hindi rin naman alon
para bantayan
kung gaano nito kadalas hagkan
ang dalampasigan.

Ang mahalaga,
dagat din naman;
kung paanong
ang pusod nito’y iisa,
gayundin itong pag-ibig ko 
sa’yo sinta.

 020712.fcs.vluna

Pag-ibig Palá

Hindi ko alam
kung ano itong nararamdaman;
habang bumibilis ang pintig sa dibdib
na parang bukal ng tubig
na nais makalaya,
para akong nasa alapaap,
nagtatampisáw sa hamog,
sa hangin ay nakayakap,
at paulit-ulit na
bumabagsak sa langit.

Hindi ko rin alam
kung bakit inaasám,
kahit minsa'y kinukurot ang puso,
bulag kung alin ang wagas at huwad.

Ni sa hanagap,
hindi ko alam ang hinahanap;
hanggang sa ika'y dumating,

pag-ibig pala.

012212.fcs.eave

Hindi Ang Aking Pagibig

Huwag pag alinlanganan
kung ang puso ko ba
laging ikaw ang pintig,
dahil hindi itó bahagharì
na makulay lang sa ilang sandalì,
hindi ito ulap na sumasakáy
lang sa hangin,
o kayà hamóg na buháy
lang sa magdamag.

Ang araw ay maaari
pang mangatóg sa lamíg,
datapuwat hindi
ang aking pagibig.

013012.fcs.kamagong