Buwayang mag asawa
nilapa ang agila,
saksakan ng timawa.
09.12.11_Diona
Kamay puno ng surot,
sa kurbata binalot,
matalinong buraot.
09.12.11_Diona
Bawat pondong nawala
o lider na nagwala
'sang kariton ang likha.
09.12.11_Diona
Huwag nang damdamin,
magdilim ang paningin,
sa kuryenteng bayarin.
09.12.11_Diona
Gabi-gabi'y dilat
araw-araw puyat
para sa mga anak.
09.11.11_Diona
Kapangyariha'y ikaw
ikaw ang bawat galaw
pag-ibig gabi't araw.
09.11.11_Diona
Madalas na pumitik
laging pa petik-petik
ganyan ang mga switik
09.10.11_Diona
Buwig-buwig na pawis
pawi-pawisang buwis
nagkaroon ng bagwis.
09.10.11_Diona
Kalabaw ang kawangis
dugo ang aking pawis
sinipsip lang ng langis.
09.10.11_Diona
Baya'y di mabibigo
kung bayani sa puso
hindi lamang sa nguso.
09.10.11_Diona
Dios dapat ang mauna,
kapwa ay pangalawa
kung nais mo sumaya.
09.10.11_Diona
Sinong mas kapuspalad,
taong salat ang palad
o mayaman na hubad?
09.10.11_Diona
Sa tao siya'y nalulong,
alipin ng alulong
na sa kanya'y bumulong.
09.10.11_Diona
Kasama kong pumasok
wala sa bawat sulok,
sa trangkahan sumuksok.
09.10.11_Diona
Pinitik ng tikatik
dumausdos sa putik,
sa nagpatumpik-tumpik.
09.09.11_Diona
Tinatahi'ng buhangin,
tinutulay ang hangin,
kaya wag mong salingin.
09.09.11_Diona
Madalas takaw tingin,
natutukso kang bilhin
kahit 'di kaylanganin.
09.09.11_Diona
Bago ibuka'ng bibig,
dal'wang beses makinig
nang ikaw ay marinig.
09.09.11_Diona
Tatag ng republika,
inanay ng timawa
pinuno ng buwaya.
09.09.11
Nakatanghod sa tuktok,
tila naghihimutok,
sa patag bumulusok.
09.09.11
