LitráTulâ

Pag-ibig Palá

2012-02-02T08:09:00.000-08:00

Hindi ko alam
kung ano itong nararamdaman;
habang bumibilis ang pintig sa dibdib
na parang bukal ng tubig
na nais makalaya,
para akong nasa alapaap,
nagtatampisáw sa hamog,
sa hangin ay nakayakap,
at paulit-ulit na
bumabagsak sa langit.

Hindi ko rin alam
kung bakit inaasám,
kahit minsa'y kinukurot ang puso,
bulag kung alin ang wagas at huwad.

Ni sa hanagap,
hindi ko alam ang hinahanap;
hanggang sa ika'y dumating,
pag-ibig pala.

012212.fcs.eave

Hindi Ang Aking Pagibig

2012-02-02T08:02:00.000-08:00

Huwag pag alinlanganan
kung ang puso ko ba
laging ikaw ang pintig,
dahil hindi itó bahagharì
na makulay lang sa ilang sandalì,
hindi ito ulap na sumasakáy
lang sa hangin,
o kayà hamóg na buháy
lang sa magdamag.

Ang araw ay maaari
pang mangatóg sa lamíg,
datapuwat hindi
ang aking pagibig.

013012.fcs.kamagong

Kulang sa Limlim

2012-01-26T07:11:00.000-08:00

Dila nga'y matalas

ngunit tila 'sang sisiw,
utak ay hulás
tumataga sa hangin
kulang pa nga sa limlim.
012112.fcs.camarin

Ikaw

2012-01-26T07:07:00.000-08:00

Sa dinami-daming kahulugan

nitong pag-ibig,

isa lang para sa akin

ang makabuluhan,

iyon ay walang iba kundi

ikaw.

012112.fcs.kalayaaan

Tubóg sa putik

2012-01-26T07:04:00.000-08:00

Panáy ang halík,
waláng sawà sa gintong
tubóg sa putik.

011812_fcs_technohub

Bahay Putakti

2012-01-26T07:02:00.000-08:00

Bahay

ng putakti,
manipis na putik,
gumuho at naging nitsong
ginto.

111212_fcs_sikatuna

Sinong Bata?

2012-01-26T06:56:00.000-08:00

Matanda'y nakasimangot;
problema, kulay ng damít,
habang sa kanyáng paanán;
'sang walang muwáng na paslit,
naglalaróng waláng saplot.

011212_fcs_kamagong

Nagpapadulás

2012-01-26T06:54:00.001-08:00

Kapág bundok kumalám,
nagpapadulás
pagdatíng ng tag-ulán.

01.07.12pca

Kapág Umulán

2012-01-26T06:53:00.001-08:00

Sa gintò nabubuhay
kapág umulán,
sa lupà namamatáy. 

01.06.12pca

Tag-ani sa Tag-ulan

2012-01-04T20:47:00.001-08:00

Ilog at karagatan

puno ng bangkay

tag-ani sa tag-ulan.

01.05.12.fcs.kamagong

Ugong

2012-01-04T20:35:00.001-08:00

Umugong itong lupa,

baha bumaba,

nang langit ay lumuha.

01.04.12_fcs_kalayaan

Waláng Magawà

2012-01-03T07:10:00.000-08:00

Meron
pa nga kayang
makapagsasabi,
'wala nga akong magawà',
liban
na nga lamang
sa nangaduduwag,
sa mga tinatamad at
patay.

010312_fcs_ever

Bago Itapon

2012-01-02T07:28:00.000-08:00

Pupulutin ko nga muna ngayon
ang mga aral sa karanasan,
mga bagay na dapat tandaan,
bago ko itapon sa kahapon. 

01.02.12¤fcs¤kalayaan 

Pawà

2012-01-01T18:25:00.001-08:00

Pawà,

tayong lahát

nangangailangan

t'yak, kung hindi pagibig ay

awà.

123011_fcs_kc

Pulburón

2012-01-01T18:24:00.000-08:00

T'wing magbabagong taón

noón hanggang sa ngayón,

buong mundo ay lulóng,

bayan hanggang sa nayon,

balót naka balumbon

sa masangsang na pulburón;

pulbura rito, pulborón!

12.29.11_fcs_nso

Agiw Sa Langit

2012-01-01T18:22:00.001-08:00

Usok ng lupà

nasagkaán ng hamóg

agiw sa langit.

12.28.11_fcs_Luzon

Katók

2012-01-01T18:21:00.001-08:00

Kinakatók ng ulán

ang mga bundok

kahit sa kapatagan.

113011_fcs_Anonas

Minumog

2012-01-01T18:20:00.000-08:00

Nilantakán ng sulóg

kawawang bayan

kapataga'y minumog

113011_fcs_Timog

Tagaktak

2012-01-01T18:18:00.001-08:00

Batóng hindi mabaak,

mangalulusaw

sa mumunting tagaktak.

112611

Putikang Mga Anghel

2011-12-27T21:19:00.000-08:00

Habang himbing sa papag,

duyang daluyong

ang yakap sa magdamag.

Habang hele ng ugong,

kandunga'y unos

sinisiklot ng alon.

Dahil sa diwang Babel,

naging kawawa

putikang mga anghel.

12.28.11_fcs_Anonas

(Alay sa mga batang tinangay ng bahang nilikha ni Bagyong Sendong

noong Dec 17, 2011 sa Iligan at CDO)

Hinihinging Bigay

2011-12-25T21:40:00.001-08:00

Isa

lang sa mga

kabalintunaan,

ang hinihinging bigay pag

pasko!

12.26.11_fcs_Anonas

Maligayang Pasko

2011-12-25T19:59:00.000-08:00

M-arami ang naghahandà,

A-balá sa pagpapalà,

L-imót sa isip ay walà

I-tóng dahiláng biyayà,

G-ayóng si Jesus ang talà,

A-ng liwanag na nagkusà,

Y-amang ang ating kalul'wà

A-y kailangan ng awà,

N-a sa dilím ay ulilà

G-ulanít nangayupapà.

P-uso kay Hesus ay buksan;

A-t itong kaligayahan

S-a saiyong waláng hanggan,

K-apayapaa'y tatahan,

O-o, magpa kailanman.

12.25.11_fcs_Anonas_Acrostic

Makabuluhang Pasko

2011-12-25T07:12:00.000-08:00

Makabuluhang Pasko

Ang kapaskuhan ay walang saysay,
kung sa kinang na taglay ng bahay
at sa handa lang nakasalalay,
sa halip na pagbabagong buhay.

Hindi rin ito makabuluhan,
kung ito ay nakakahon lamang
sa pagtanggap ng mga regalo,
sa halip na pagtanggap kay Cristo.

12.25.11_fcs_home

Dalangin ko'y makabuluhang pasko sa lahat!

Patay Na

2011-12-19T01:07:00.001-08:00

Ayon sa pamahalaan,

gumanda na raw

ang ekonomiya

at ang bilang

ng mga nagugutom

ay bumaba, anila...

...patay na kasi yung iba.

12.19.11_fcs_Molave

Kung Kailan Kailangan

2011-12-18T23:36:00.000-08:00

Kung kailan kailangan

ay wala;

ang presensya,

ang haplos,

ang pagdamay,

ang malasakit,

para sa kababayang

nasa gitna ng sakuna

at mga pasakit.

Ano nga ba ang aasahan

sa isang ama,

na kailanman

hindi naging ama?

12.19.11_fcs_Molave

Magandang Buhay

2011-12-18T22:53:00.000-08:00

Magandang buhay...

anák

ang aking pangarap,

tanging alay sa'yó;

higít

sa aking kalingà,

pag-ibig ng Diyos,

higít

sa'king pag-iingat,

kaligtasan kay Hesús,

higít

sa aking pangakò,

pag-asa sa Kanya,

higít

sa magandang bahay,

magandang tahanan

doon

...sa kabilang buhay!

12.05.11_fcs_sss

Debotong Pulubi

2011-12-18T22:26:00.000-08:00

Panáy rosaryo

laging nasa simbahan,

lahat ng santo

paá'y hinahalikan,

pero asal gahaman.

120211_tangkà sa tanka

Magulang

2011-12-16T22:04:00.000-08:00

Maghapong nagsusugál

at ang kanyang kabiyak;

laging langò sa alak,

isang dakilang hangál,

habang nangangalakal

ang sandosenang anák,

sa halíp na mag-aral.

Ang isá, ay talunán

umuwíng nagugutom,

habang pagulong-gulong

dahil sa kalasingan,

ang asawang nagwalà

patí itóng sikmurà,

magulang na magulang.

113011_fcs_tandang sora

Sakit? Sakim!

2011-11-27T06:26:00.001-08:00

Sakít
ang nilikhà
nitóng pandarayà,
kayá 'wag kang pahawa sa
sakím.

112511

Sawsawero

2011-11-27T06:09:00.001-08:00

Markahan sa kalendaryo
itong mga sawsawero,
na palaging may komento
sa halos lahat ng isyu
at astang matatalino;
t'yak yun, hindi magsasanto

sa halalan, kandidato.

112411_fcs_sevenling

Ampat

2011-11-27T06:00:00.001-08:00

Dalawang taón na ang lumipas,
sariwa pa rin ang mga sugat
at ang mga luha'y 'di maampat,
hangga't wala pang ngipin ang batás.

Limampu't waló ang tinambangan,
mga pangarap doón nagwakás,
waláng awang tinapal sa butas,
ng dayà at kasinungalingan.

Maampat pa kayà ang panaghoy,
ng mga nangagbuwis ng buhay;
kung katarungan, piríng nga'y taglay,
manipis naman nakalulu-oy?

11.23.11_fcs

Lahát

2011-11-13T06:05:00.001-08:00

Anó,
anóng tulong,
anóng kailangan
ang hindi N'ya maibigáy;
saán
pa lalapit,
kung kay Jesu-Cristo,
ibinigáy sa tao ang
lahat?

11.13.11_fcs_Zapote

Onse

2011-11-12T06:25:00.001-08:00

Numero,
pangalan,
palayaw,
gamit na
simula nang magkatao.

Ahas,
luminlang,
abuso,
bilang nang
mawalá si Hudas.

11.11.11

Waláng Kapantay

2011-11-08T06:53:00.000-08:00

Kung paanong sa araw at gabí,
palaging hinahagkan ng alon,
ang malawak na dalampasigan,
gayundin at 'di maitatanggi
itong pag-ibig ng Panginoon;
waláng pagod, di mapapantayan.

fcs_xi.viii.xi_technohub

(Ang magandang litrato ay mula sa isang kababayan na nagngangalang Manay Letty Catalan(at siyempre may pahintulot)) 

Sukdulan

2011-11-05T16:46:00.000-07:00

Habang ang bawat sandalî
pawang mga alingawngaw,
saglít na mananatilì
kapagdaka'y pumapanaw.

Ang tao naman...

...samantalang nilalasíng
ng mundóng pansamantala,
dahan-dahang nahahalíng
sa buhay, 'di maabala...

...na walang kamalay-malay
kung kailán magaganáp
ang isá o dal'wáng igláp,
kaylanma'y 'di malalaman
itong dulo ng sukdulan.

xi.v.xi_jw@nso

Butóng Pakwan

2011-11-03T20:34:00.000-07:00

Sa umpisá'y
punô ang putíng lalagyan
ng butóng kulay dilím
na dahan-dahang kinukukót.

Habang lumalalim ang gabí
na kalaró ang baraha,
paunti nang pauntì
ang butóng pipi.

Dalawang oras ang lumipas;
ubós na ang mga butó,
nagkalat ang mga kabiyak na balát.

Mulá sa lamay na patí ulán nakikiramay,
binaybáy ang daán pauwì.
Habang nagmumunimuni,
tinatanong ang sarili;
ilang gabí pa kayâ
ang nakalaán
upang ang mga mahál
ay patuloy na masilayan?

Ang sagót ko'y hindi ko alám!

Ang alám ko lang,
para tayong mga butóng pakwan.

xi.iii.xi_fcs

Kailan?

2011-11-03T20:33:00.001-07:00

Kailan ang tamang panahón,
kailan bibigyan ng pansin
na tayo'y pawang mga dahon;
matutuyô sa maghapon, 
matapos pitasín ng hangin,
lahat sa lupà mababaón?

Kailan mauunawàan
na ang pagdatíng at pag alís
ay mistulang paták ng ulán,
mabubuó at  ititigis,
mangaglalahò sa hantungan?

xi.iv.xi_fcs

Ang Pagasa Ko

2011-11-02T21:54:00.001-07:00

Ang ilán,
sandigan ang kayamanan
o lakás ang sandatahán.
Ang sandigan ko'y si Cristo.

Ang ilán,
umaasa sa kabayo
at kalakasan ng tao.
Ang lakás ko ay si Cristo.

Ang ilán,
pagasa ang kapalaran
at taglay na kasikatan.
Ang pagasa ko'y si Cristo.

xi.iii.xi_fcs

Walâ

2011-11-01T20:50:00.000-07:00

Walâ,
doón lahát
uuwî sa walâ;
ngunit kung nagtiwalà kay
Cristo,
buhay
Niyang alók'di binalewalâ,
langit ay 'di uuwî sa
walâ.

xi.ii.xi_mirror cinquain_fcs

Sinampay

2011-10-31T07:23:00.001-07:00

Lupa't ulan nag away,
linublob mga bahay,
basura isinampay.

x.xxxi.xi_Diona

Tahan na Ulan

2011-10-31T07:20:00.000-07:00

Nang tumahan ang ulán,
diwang ang basurahan,
lumbay ang kapatagan.

x.xxxi.xi_Diona

Sundín Ang Loób Mo

2011-10-18T05:05:00.000-07:00

Hinugasan sa karumihan ko,

nang itigis itong dugó Mo,

itinuwíd sa pagkakalumpó,

nang mabalì ang mga butó Mo,

pinalayà ang kaluluwa ko,

nang akûin ang kasalanan ko,

naging walang hanggan ang buhay ko

nang Iká'y mamatay sa kalbaryo,

kasa-kasama ang presensya Mo

nang Iká'y tumahan sa puso ko.

Ngayón, sa lahat nang ginawá Mo,

susundin pa rin ba ang loób ko?

x.viii.xi_fcs

Baryá

2011-10-13T21:36:00.000-07:00

Sa umaga,

tigá bilíng pandesal

tigá tapon ng basura

kapalit ang konting baryá.

Sa hapon,

namumulot ng kartón

pamatíd gutom

pandagdag sa baon.

Sa gabi,

abalá sa palengkè

katuwáng sa bilyaran,

daig pa'ng magulang.

Hating gabí,

nang ito'y pauwî,

inagaw ng kalsada

ang ipong barya.

x.xiv.xi_fcs

(Handog ko sa kapitbahay kong si JR - isang paslit na inagaw

ng mundong malupit sa Commondeath Highway)

Delubyo

2011-10-12T22:11:00.000-07:00

Nang langit ay lumuhâ

baya'y nangayupapâ

naglaho itong lupâ.

x.x.xi_fcs

Basura! Basura!

2011-10-12T21:40:00.001-07:00

"Basura, basura!"

Sigaw ng basurero isang umaga.

"Mga nabubulok ngayong Martes,

di nabubulok sa Huwebes!"

Hirit pa nya.

Lumabas ang aking kapitbahay

na kapupunas pa lang ng laway.

"Bakit di nyo kinukuha ang basura ko,

nakabalot naman ito?"

Angal ng mamang mareklamo.

"Halu-halo po kasi basura nyo!"

Katwiran ng basurero.

"Dati naman kinukuha ninyo,

kayo na ang maghiwa-hiwalay.

Kung ayaw nyong mabahuan,

mag opisina kayo!"

Tuyâ ng mamang bata.

Dumating ang Huwebes,

bumalik ang mga basurero.

Matiyaga uling naghakot.

"Basura! Basura!"

Iba ang bigkas at tono.

"Basura nang hindi pa nabubulok!"

Singhal nya pagtapat sa bahay

ng tulog pang maangal.

x.xii.xi_fcs

Nariyan Ka

2011-10-10T06:42:00.000-07:00

Sa isang sulok
kung saan ang diwa
ay ligalig sa gitna ng
agam-agam at kabagabagan,
naroon Ka.


Sa isang sulok
kung saan ang puso
ay lagalag sa gitna ng
panlalamig at alalahanin,
naroon Ka.


Sa isang sulok
kung saan ang kalul'wa'y
lupaypay sa gitna ng
dilim at liwanag,
naroon Ka.


Sa bawat sulok
kung saan hungkag
ang buhay sa gitna ng
tagumpay at kabiguan,
o Dios, nariyan Ka.


x.x.xi_fcs

Sa Anino ng Iyong Bagwis

2011-10-07T01:26:00.000-07:00

Payapa ang puso ko

malupit man ang bagyo,

hindi mag aalala

dahil Ika'y kasama.

Buhay man ay mabangis,

pinahid ang pagtangis,

dahil aking sanggalang,

anino ng 'Yong bagwis.

x.vi.xi

Kulimbat

2011-09-25T06:35:00.001-07:00

Madaling mangulimbat

kung ang mga kasabwat

ay puro mga alat.

09.25.11_Diona

Ginisang Gatasan

2011-09-25T06:29:00.001-07:00

Boto'y sinalaula

ginigisa ang madla

sa sariling mantika.

09.25.11_Diona

Patutot

2011-09-25T06:10:00.000-07:00

Gabi-gabi ay dilat

nang mabilad ang balat

pati kalul'wa'y salat.

09.25.11_Diona

Kumpletong Araw

2011-09-24T06:24:00.001-07:00

Sumasagwan akong paahon sa daluyong habang nililiglig ang magkabilang katig ng malilikot na alon. Pagkatapos mabanat ang mga buto, narating din ang ituktok at tumambad sa akin ang isang paraiso. Payapa ang paligid; ni hindi mo maririnig ang lagaslas ng talon na humahalik sa lawa, matining ang tubig. Payak ang buhay, halos pabulong kung mag-usap ang mga taga nayon, maaliwalas ang kanilang mga ngiti.

Ang napansin ko lang,
tila pangalawang beses ko na itong narating,
madali rin akong nainip.

Ang lugar, perpekto na sana bagaman nakabibighani,
kaya lang parang may kulang...

"Dadi gising na, mahuhuli ka na sa trabaho!"

Kumpleto na naman
ang araw ko.

09.24.11_fCs

Kung Ika'y Kapiling

2011-09-20T06:16:00.001-07:00

Ang dagat;

masarap panoorin

habang kayakap

ang buhangin, 

masarap languyin

habang dinuduyan

sa ihip ng hangin,

pero mas masarap kung ito'y tatawirin...

...at ikaw ang kapiling.

09.20.11 

Kundi Ikaw

2011-09-18T07:31:00.000-07:00

Hindi kailangan ng pag-ibig ko
ang buwan sa kalawakan
o bituing makinang;
walang harana,
walang rosas,
walang sayaw.

Hindi kailangan ng pag-ibig ko
ang lahat ng mga bagay...

...kundi ikaw.

09.19.11
Happy Anniversary sating dalawa mahal ko...

Ang Aking Katugma

2011-09-18T07:23:00.001-07:00

Ano pang kwenta
na makagawa
ng 'sang sonata
kung mawala ka?

Ikaw ang aking tula
sa buhay ko'y tumutugma,
parang ihip ng amihan,
dala-dala ang ginhawa
sa aking puso at kaluluwa
habang idinuduyan
sa lilim ng iyong
mahalimuyak
na pag-big
na nakabigkis
sa pag-ibig ng Diyos.

09.16.11
~~~~~~~~~~~~~~~~~
Maligayang kaarawan sa'yo Franz, mahal kong esposa...sensya na...natrapik ng konti sa langit ang aking pa pansit!

Pabigat

2011-09-16T06:52:00.000-07:00

Syang sa baya'y pabigat,
itapong nararapat
sa kumukulong dagat.

09.16.11_Diona

Barya sa Tenga

2011-09-16T06:46:00.000-07:00

Isang linggong kinita
inuwi sa pamilya
barya-barya sa tenga.

09.16.11_Diona

Bayaning Walang Pangalan

2011-09-16T00:08:00.000-07:00

Di marunong tumula
wala rin librong likha,
mahal lamang ang kapwa.

09.16.11_Diona

Ganid

2011-09-16T00:04:00.000-07:00

Sa nakaw nabubusog
sumasahod nang tulog
syang sugapa sa bilog.

09.16.11_Diona

Kapuspalad

2011-09-16T00:01:00.000-07:00

Mata lamang ang busog
palubog nang palubog
sumasahod ng hamog.

09.16.11_Diona

Kurap

2011-09-14T08:22:00.001-07:00

Silang tinitingala
kunwa'y may ginagawa
daig pa'ng salaula.

09.14.11_Diona

Tulisan

2011-09-14T08:02:00.000-07:00

Akala ko'y sandigan
iniluklok ng bayan
isa palang gahaman.

09.14.11_Diona

Talamak

2011-09-14T07:51:00.000-07:00

Mandaya laging balak
sa kanila'y marapat
isukang parang alak.

09.14.11_Diona

Mandarambong

2011-09-14T07:31:00.000-07:00

Nakakurbatang hambog,
sa pandarambong bantog,
tulad sa batang hamog.

09.14.11_Diona

Kakutsaba

2011-09-13T08:47:00.000-07:00

Kakutsaba ng amo
sa bayang ginagantso,
matatalinong bobo.

09.13.11_Diona

Sinturon

2011-09-12T08:30:00.000-07:00

Kay Rizal napatingin
kahit ano pang gawin
manggagawa ay bitin.

09.12.11_Diona

Timawa

2011-09-12T07:18:00.000-07:00

Buwayang mag asawa
nilapa ang agila,
saksakan ng timawa.

09.12.11_Diona

Buraot

2011-09-12T06:46:00.000-07:00

Kamay puno ng surot,
sa kurbata binalot,
matalinong buraot.

09.12.11_Diona

Sangkariton

2011-09-12T06:03:00.000-07:00

Bawat pondong nawala
o lider na nagwala
'sang kariton ang likha.

09.12.11_Diona

Monopolya

2011-09-11T22:54:00.000-07:00

Huwag nang damdamin,
magdilim ang paningin,
sa kuryenteng bayarin.

09.12.11_Diona

Hostes

2011-09-11T06:40:00.000-07:00

Gabi-gabi'y dilat
araw-araw puyat
para sa mga anak.

09.11.11_Diona

Inspirasyon

2011-09-11T06:18:00.001-07:00

Kapangyariha'y ikaw
ikaw ang bawat galaw
pag-ibig gabi't araw.

09.11.11_Diona

Switik

2011-09-10T08:25:00.000-07:00

Madalas na pumitik
laging pa petik-petik
ganyan ang mga switik

09.10.11_Diona

Buwis Nagkabagwis

2011-09-10T07:28:00.000-07:00

Buwig-buwig na pawis
pawi-pawisang buwis
nagkaroon ng bagwis.

09.10.11_Diona

Gatasan

2011-09-10T07:19:00.000-07:00

Kalabaw ang kawangis
dugo ang aking pawis
sinipsip lang ng langis.

09.10.11_Diona

Sa Puso

2011-09-10T02:18:00.000-07:00

Baya'y di mabibigo
kung bayani sa puso
hindi lamang sa nguso.

09.10.11_Diona

Una Sa Lahat

2011-09-09T19:58:00.000-07:00

Dios dapat ang mauna,
kapwa ay pangalawa
kung nais mo sumaya.

09.10.11_Diona

Kapuspalad

2011-09-09T10:02:00.000-07:00

Sinong mas kapuspalad,
taong salat ang palad
o mayaman na hubad?

09.10.11_Diona

Buwaya

2011-09-09T09:40:00.000-07:00

Sa tao siya'y nalulong,
alipin ng alulong
na sa kanya'y bumulong.

09.10.11_Diona

Multong Kawani

2011-09-09T09:38:00.000-07:00

Kasama kong pumasok
wala sa bawat sulok,
sa trangkahan sumuksok.

09.10.11_Diona

Makiramdam sa Ulan

2011-09-09T08:58:00.000-07:00

Pinitik ng tikatik

dumausdos sa putik,

sa nagpatumpik-tumpik.

09.09.11_Diona

Konsentrasyon

2011-09-09T08:24:00.000-07:00

Tinatahi'ng buhangin,
tinutulay ang hangin,
kaya wag mong salingin.

09.09.11_Diona

Takaw Tingin

2011-09-09T07:44:00.000-07:00

Madalas takaw tingin,
natutukso kang bilhin
kahit 'di kaylanganin.

09.09.11_Diona

Pagkakaunawaan

2011-09-09T07:38:00.001-07:00

Bago ibuka'ng bibig,
dal'wang beses makinig
nang ikaw ay marinig.

09.09.11_Diona

Tatag na Inanay

2011-09-09T07:23:00.000-07:00

Tatag ng republika,
inanay ng timawa
pinuno ng buwaya.

09.09.11

Guho

2011-09-09T07:19:00.001-07:00

Nakatanghod sa tuktok,
tila naghihimutok,
sa patag bumulusok.

09.09.11

Nabato

2011-08-31T09:11:00.000-07:00

Nakatanghod sa tuktok
biglang nabato
sa patag bumulusok.

083111

Pinitik

2011-08-31T09:07:00.000-07:00

Pinitik ng tikatik
bato'y gumulong
sa bahay tumiwarik.

083111

Upod na Langit

2011-08-31T09:03:00.000-07:00

Nauupod ang langit
kurot sa buto
init lumalagitnit.

081711

Babaan

2011-08-31T08:59:00.000-07:00

Di sanay sa babaan
gustong bumaba
doon sa sangandaan.

081711

Sinalaulâ

2011-08-31T08:57:00.000-07:00

Magagandang nilikhâ
walang patumanggâ
pawang sinalaulâ.

081711

Yaman ng Ilan

2011-08-31T08:46:00.000-07:00

Usok ng kaunlaran
yaman ng ilan
pasan ng karamihan.

081711

Abo ang Langit

2011-08-31T08:44:00.000-07:00

Nagpuputik ang hangin
abo ang langit
madilim sa paningin.

081711

Ilegal na Troso

2011-08-31T08:40:00.000-07:00

Bulok bago umusbong
itim ang dugô
sa ilog ay nalulong.

81611

Estero

2011-08-31T08:36:00.000-07:00

Ang tubig nya'y mabahô
puno ng dumi
unti-unting naglahô.

81611

Polusyon sa Hangin

2011-08-31T08:33:00.000-07:00

Hanging mapaminsalâ
bukod sa dahon
sinasala ng bagâ.

81611

Hindi Binibili

2011-08-23T05:53:00.001-07:00

"Daddy, sa susunod po sana makapal na 'jigsaw puzzle' na ang gawin mo. Yung sa mga kaklase ko po kasi makapal ang puzzle nila, sa akin lang ang manipis. Bumili daw po kasi sila sa Ever."

"Ganun ba, pasensya na anak, pagtiyagaan mo na yang inukit ko total mas makapal naman siya dalawang pirasong papel. Ang pagkaka alam ko kasi sa takdang aralin, ginagawa at hindi binibili."

08.23.11

Maingay Kasi

2011-08-22T08:56:00.001-07:00

"Mommy, ang lakas ng ulan kaninang madaling araw no?" "Oo, may bagyo kasi..."Sumabat na naman ang batang si Keno..."oo nga po eh, kaya nga nagtakip ako ng tenga...maingay kasi."

hehehe!

08.22.11

Brand X

2011-08-22T08:53:00.001-07:00

Isang gabi habang kumakain at nanonood ng TV, pinalabas ang isang patalastas ng gamot tungkol sa lagnat ng bata. Doon, pina inom ng brand x ang bata. Obviously, sa halip na gumaling, lumala pa ang sakit nito dahil hindi yung dapat na brand ang pinainom.

Walang kaabog-abog, sumabat ang grade 1 kong anak na si Keno..."brand x na naman, di ba sabon yun mommy? Kaya pala hindi gumagaling yung bata!"

08.22.11

Magkadugo

2011-08-22T08:51:00.001-07:00

Naherak ako kan ma dengue su matu-a ko ta aro-aldaw kaya pig kuku-ahan ki dugo. Sarong aldaw pagka hiling sa doktor, huminibi tolos dangan naki maherak sa mommy nya...

"...huhuhu, mommy, ayoko na po...kasi masakit!"
"Hindi pwede anak, kung pwede nga lang ako na lang ang kunan ng dugo para hindi ka na masaktan kaso ikaw ang maysakit eh!"

"Ikaw na lang po mommy please magpakuha!"

"Wag kang makulit anak, hindi nga pwede!"

"Pwede po yun mommy, di ba po magka dugo naman tayo, magkaka dugo tayo nina daddy saka ni Mico kaya pwede yun!"

Kaya su agum ko napa ulok na sana, imbes na mauyam.

08.18.11

Aso

2011-08-16T07:43:00.001-07:00

Mas gusto ko pa
maging aso
pagkai'y tira-tirang momo,
wag lang sa kurap makisalo.

08.15.11

LitráTulâ

Pag-ibig Palá

Hindi Ang Aking Pagibig

Kulang sa Limlim

Ikaw

Tubóg sa putik

Bahay Putakti

Sinong Bata?

Nagpapadulás

Kapág Umulán

Tag-ani sa Tag-ulan

Ugong

Waláng Magawà

Bago Itapon

Pawà

Pulburón

Agiw Sa Langit

Katók

Minumog

Tagaktak

Putikang Mga Anghel

Hinihinging Bigay

Maligayang Pasko

Makabuluhang Pasko

Patay Na

Kung Kailan Kailangan

Magandang Buhay

Debotong Pulubi

Magulang

Sakit? Sakim!

Sawsawero

Ampat

Lahát

Anó,anóng tulong,anóng kailanganang hindi N'ya maibigáy;saánpa lalapit,kung kay Jesu-Cristo,ibinigáy sa tao anglahat?11.13.11_fcs_Zapote

Onse

Waláng Kapantay

Sukdulan

Butóng Pakwan

Kailan?

Ang Pagasa Ko

Ang ilán, sandigan ang kayamanan o lakás ang sandatahán. Ang sandigan ko'y si Cristo. Ang ilán, umaasa sa kabayo at kalakasan ng tao. Ang lakás ko ay si Cristo. Ang ilán, pagasa ang kapalaran at taglay na kasikatan. Ang pagasa ko'y si Cristo. xi.iii.xi_fcs

Walâ

Sinampay

Tahan na Ulan

Nang tumahan ang ulán, diwang ang basurahan, lumbay ang kapatagan.

x.xxxi.xi_Diona

Sundín Ang Loób Mo

Baryá

Delubyo

Basura! Basura!

Nariyan Ka

Sa Anino ng Iyong Bagwis

Kulimbat

Ginisang Gatasan

Patutot

Kumpletong Araw

Kung Ika'y Kapiling

Kundi Ikaw

Ang Aking Katugma

Pabigat

Barya sa Tenga

Bayaning Walang Pangalan

Ganid

Kapuspalad

Kurap

Tulisan

Talamak

Mandarambong

Kakutsaba

Sinturon

Timawa

Buraot

Sangkariton

Monopolya

Hostes

Inspirasyon

Switik

Buwis Nagkabagwis

Gatasan

Sa Puso

Anó,
anóng tulong,
anóng kailangan
ang hindi N'ya maibigáy;
saán
pa lalapit,
kung kay Jesu-Cristo,
ibinigáy sa tao ang
lahat?

11.13.11_fcs_Zapote

Ang ilán,
sandigan ang kayamanan
o lakás ang sandatahán.
Ang sandigan ko'y si Cristo.

Ang ilán,
umaasa sa kabayo
at kalakasan ng tao.
Ang lakás ko ay si Cristo.

Ang ilán,
pagasa ang kapalaran
at taglay na kasikatan.
Ang pagasa ko'y si Cristo.

xi.iii.xi_fcs

Nang tumahan ang ulán,
diwang ang basurahan,
lumbay ang kapatagan.

Tatag ng republika,
inanay ng timawa
pinuno ng buwaya.